Бир гәдәр дә дустаглыг һәјатымдан бәһс етмәк истәрдим. Әслиндә һәбсә алындығым замандан 1 ил сонра мәним шәрти олараг азадлыға чыхмаг һүгугум варды. Амма мәнә дедиләр ки, Ҝүрҹүстан вәтәндашы олдуғума ҝөрә ил јарымдан сонра чыха биләрәм. Отуруб ҝөзләмәкдән башга чарәм јох иди. Һәбсханада мүнтәзәм идманла мәшғул олурдум: орду һәјатындан галма бир вәрдишим иди ки, һәр сәһәр вә ахшам идмана вахт ајырырдым. Ејни заманда мүшаһидә едирдим ки, бу, һәбсхана рәһбәрлијинин хошуна ҝәлмир. Онларын сәбри чатмады вә нәһајәт, ҝүнүн бириндә мәни рәисин јанына чағырдылар. Рәис деди ки, рәһбәрлик сәнин һәбсханадан гачмаг планларынын олдуғу һагда мәлумат әлдә едиб вә идмана да буна ҝөрә хүсуси фикир вердијини билирик. Буна ҝөрә дә идманы бурахмамы тәләб етди. Мән онун үзүнә бахдым вә һеч нә демәдән чыхдым. Бундан сонра идманла баракда, чарпајыларын арасында мәшғул олмаға башладым.

әввәли өтән сајларымызда

Буранын јајы әсл ҹәһәннәм истиси иди. Үстүнә бир шеј атыб јатмаг мүмкүн дејилди. Буна ҝөрә дә дустагларын чоху өз чарпајыларында мичәткәнә бәнзәр бир шеј дүзәлдиб јатырдылар ки, һәм дә нәһәнҝ ағҹаганад гошунларынын һүҹумларындан өзләрини горусунлар. Амма мәнә буну да етмәк јасаг едилмишди. Мән боғазыма гәдәр одејала бүрүнүб садәҹә үзүмү тәнзифлә өртәрәк јатмаға мәҹбур идим. Һәтта буну да һамы јатандан ве нәзарәтчилер орталыгдан чәкиләндән сонра едирдим.

Бир парча кәтан вә даһа 6 ај

Ганунла нәзәрдә тутулан гајдаја ҝөрә, бурадан чыхмағыма икиҹә ҝүн галмыш мәни рәисин јанына чағырдылар. Рәис деди ки, сәнин бүтүн сәнәдләрин һазырдыр, амма ислаһ олунмадығына ҝөрә сәни азадлыға бураха билмәрик. Мән ислаһ олунмадығымын нәдә ифадә едилдијини сорушанда исә о деди ки, ҝеҹәләр јатанда үзүнү тәнзифлә өртүрсән. Бәли, мәһз, белә! Рәис изаһ етди ки, бу гајда позунтусуна ҝөрә мән даһа 6 ај һәбсдә галмалыјам. Һәбсхананын өз гајдалары вар вә онларын мәни нәјә тәһрик етдикләрини анлајырдым. Амма бу хырда инсанларла бу мәсәләләр үзәриндә мүбаһисә јаратмағы өзүмә сығышдыра билмәздим. Вә мән бу балаҹа тәнзиф парчасындан өтрү даһа 6 ај һәбсдә галмалы олдум. Бу мүддәтдә бәзи депутатлар мәнимлә ҝөрүшә ҝәлдиләр. Әлбәттә, јухарыларын разылығы илә. Мәгсәд бу иди ки, мәни әфв әризәси јазмаға разы салсынлар. Мән нараһатлыг үчүн онлара тәшәккүр етдим вә әлбәттә, мүсбәт ҹаваб вермәдән онлардан ајрылдым.

1997-ҹи илин октјабрында аминистија гануну чыхды вә тәсадүфән мәним маддәм дә һәмин гануна дүшдү. Мәни јенә рәисин јанына дәвәт етдиләр, тәбрик етдиләр вә билдирдиләр ки, Әлијевә әфв әризәси јазыб ҝетмәлијәм. Мән исә кәскин етиразымы билдирдим. Бундан сонра даһа 6 ај мәни орада сахладылар. Һәр дәфә аиләм мәнимлә ҝөрүшә ҝәләндә дә тәбии ки, онлары да тәлиматландырырдылар ки, мәни јола ҝәтирсинләр. Онлара дејирдиләр ки, бахын, бүтүн сәнәдләр һазырдыр, адам садәҹә олараг, әризә јазыб бурадан чыхмалыдыр. Хатырлајырам ки, бир дәфә азјашлы оғлум мәнә деди ки, әризә јазыб чыхым вә бирликдә евимизә ҝедәк. Мән она дедим ки, бах, оғлум, мән әризә јазыб чыха биләрәм, амма ҝәрәк адымы да дәјишим вә бурадан чыхандан сонра мәни башга адла чағырсынлар. Бундан сонра оғлум мәнә һеч нә демәди.

Рәис ҹибимә нәсә дүртдү вә мән ону чыхара билмәдим

1998-ҹи илин апрел ајынын 17-дә аминистијанын мүддәти баша чатды. Мәни рәисин јанына чағырдылар вә орада рәисин јериндә баш идарәнин рәиси Ајдын Гасымовун отурдуғуну ҝөрдүм. Ајдын Гасымовдан башга бурада Баш Нәзарәт Идарәсинин рәиси Һабил Гурбанов да варды. Онлар тәләб етдиләр ки, ја әризә јазыб ҝет, ја да һеч заман бурадан чыхмајаҹагсан. Мән јенә дә сәрт етираз етдим вә чөлә мәктуб ҝөндәрәрәк мәнә гаршы бу ганунсузлуглар барәдә әтрафлы мәлумат вердим. Ајдын Гасымов вә Һабил Гурбанов бу ҝүнләр әрзиндә бир нечә дәфә, бәзән һәтта бир ҝүн әрзиндә бир нечә јол ҝәлиб мәни дилә тутмаға, һәдә-горху ҝәлмәјә башладылар. Мән баша дүшүрдүм ки, онлар тәләсирләр. Аминистијанын мүддәти артыг 3 ҝүн иди ки, битмишди. Апрелин 20-дә ҝеҹә мәни бир даһа Ајдын Гасымовла ҝөрүшдүрдүләр вә о, бир даһа әризә јазмаг тәклиф едәрәк рәдд ҹавабы алды. Бу ҝөрүшүмүздә о, әлини мәним ҹибимә салыб зорла ора нәсә гојду. Мән нә гәдәр мүгавимәт ҝөстәрсәм дә мүмкүн олмады. О, ҹидд-ҹәһдлә хаһиш етди ки, мән онун вердијини гәбул едим. Бу адамлар чох мискин вәзијјәтдә ҝөрүнүрдүләр вә онларын нејләмәк истәдијини, ачығы баша дүшмүрдүм. Онлардан тәләб едирдим ки, аминистија һаггында гануна әлавә едәрәк бу ганунун Иса Садыгова дәхли олмадығыны рәсмән елан етсинләр ки, мәним бундан сонра да ичәридә отурмағымын гануни әсасы олсун. Бу заман Ајдын Гасымов хаһиш етди ки, белә бир әризәми, ачыгламамы јазым: “әҝәр мүһарибә башларса, али баш командан Әлијевин әмри илә јенидән дөјүшә јолланмаға һазырам”. Мән ҝүлдүм вә билдирдим ки, буну јазмаг белә намуслу бир забит үчүн һәгарәтдир, чүнки мүһарибә башларса, ораја јолланмаг мәним борҹумдур вә бундан өтрү Әлијевин вә ја бир башгасынын чағырышыны ҝөзләмәјә еһтијаҹ јохдур вә олмајаҹаг.

Бүтүн бу сөһбәт мүддәтиндә Һабил Гурбанов сусурду. Нәһајәт, Ајдын Гасымовла сөһбәтин сәмәрәсизлијини ҝөрүб мүдахилә етди.

Баш прокурорла бирликдә Һејдәр Әлијевин јанында олмалысан!

Билдирди ки, Баш прокурор президентин јанына галхараг сизин ганунсуз һәбсдә сахландығыныз барәдә мәлумат вериб. Ҹәнаб президент сизин һәбсдә олмағынызы ешидәрәк чох пәришан олуб. Онун бундан хәбәри јохмуш. Елдар Һәсәнова ҝөстәриш вериб ки, мәни дәрһал азад етсин вә 5 мај 1998-ҹи илдә икимиз дә бирликдә онун гәбулунда олаг...

Иса Садыгов

арды вар

Диггәт: Хәбәрдән истифадә етдикдә мәнбәјә истинад лазымдыр