Әһли Бејт -АБНА- хәбәр аҝентлијинин вердији хәбәрә әсасән АБШ-ын нүфузлу "The Foreign Policy" журналында дәрҹ олунан Азәрбајҹанын Исраилә һәрби һава базаларындан истифадә һүгугу вемәсилә бағлы хәбәр Америка ҹәмијјәтинә вә сијаси даирәләрдә бөјүк резонанс јарадыб. Хәбәри журнала истинадән "CNN", "The Cristian Science Monitor" кими нүфузлу медиа гурумлары да јајыб. Рәји сорушулан експертләрин бәзиләри хәбәрин јајылмасына ҝөрә һәтта президент Барак Обаманы һәдәф алыб.

"Fox News" телеканалы хәбәрлә бағлы АБШ-ын БМТ-дәки кечмиш сәфири Ҹон Болтонун мүнасибәтини өјрәниб. Кечмиш сәфир ачыгламасында Обама администрасијасыны Исраилин һәрби планларыны ачыгламагда ҝүнаһландырыб. Болтонун сөзләринә ҝөрә, Обама Исраилин Ирана гаршы мүһарибәјә башламасына һәр васитә илә мане олмаг истәјир. Онун фикринҹә, информасијанын мәтбуата сызмасы да Ағ Евин мүһарибәнин гаршысыны алмаг ҹәһдидир.

Әлавә едәк ки, АБШ-ын мүдафиә назири Леон Панетта Исраилин апрел, мај, ијун ајларында Иранын нүвә објектләрини бомбалајҹағыны билдирмишди. Обаманын рәгибләри ону Ирана гаршы јумшаг сијасәт апармагда ҝүнаһландырырлар. Мүһафизәкар медиа гуруму олан "The World Net Daily" Обаманы Иранла ҝизли данышыглар апармагда иттиһам едиб. Вашингтон зәманәт алмаг истәјир ки, Исраилин мүмкүн һәрби әмәлијјаты заманы Иран ҹаваб олараг, АБШ-а мәхсус һәрби базалары вурмасын.

АБШ медиасыјла јанашы, Исраил мәтбуаты да Обама администрасијасыны хәјанәтдә ҝүнаһландырыб. Исраилдәки бәзи аналитикләр Обама администрасијасыны биләрәкдән Исраил вә Азәрбајҹан арасындакы мәхфи разылашмалары мәтбуата сыздырмагда иттиһам едибләр. "ABC News" хүсуси вурғулајыр ки, "The Foreign Policy" журналында чыхан јазы Азәрбајҹанла Исраил арасындакы сых һәрби әлагәләрдән вә АБШ кәшфијјатчыларынын буна мүнасибәтиндән бәһс едир.

Милли Тәһлүкәсизлик Арашдырмалары Институтунун експерти Јоел Гузански билдириб ки, бу, Исраили Ирана һүҹумдан јајындырмаг мәгсәдилә апарылан кампанијаја охшајыр: "Обама администрасијасы хејли нараһатдыр ки, Исраил тезликлә Ирана һүҹум едәҹәк. АБШ бунун гаршысыны һәр вәҹһлә алмаға чалышыр".

Гузанскинин сөзләринә ҝөрә, белә бир анлашма Исраил үчүн Ираны вурмағы хејли асанлашдырыр.

Исраилдә јајымланан "Yediot Ahronot" гәзетиндә "Обама Исраилә хәјанәт едир?" башлыглы мәгалә јазан Рон Бен Јишај Тәл-Әвивлә Бакы арасындакы разылашманын мәтбуата сызмасыны террор актына бәнзәдиб. Онун сөзләринә ҝөрә, Обама администрасијасы Исраилин Ирана һүҹума кечмәмәси вә бунун чәтин олдуғуну изаһ етмәк үчүн һәр шеји едир. Ән писи исә одур ки, һүҹум олаҹағы тәгдирдә, баш верәнләр Исраилин иткиләрини артыра биләр.

"The Guardian"а данышан експерт Бренда Шеффер исә Тәл-Әвивлә Бакы арасында имзаланмыш 1.6 милјард долларлыг разылашманы хатырладараг, бу сазишин Иранын тәһдидинә гаршы һесабландығыны аз еһтимал етдијини дејиб: "Азәрбајҹан Иран, Русија вә Түркијә илә гоншудур. Онун игтисадијјаты тәһлүкәсиз нефт дашынмасындан асылыдыр. Азәрбајҹан Иранла достлуг мүнасибәтләрини горумаға чалышыр. Исраиллә дә һәмчинин. Азәрбајҹанын рискли аддымлар атмасы чох тәһлүкәлидир. Әҝәр Иранла һәр һансы силаһлы конфликт баш версә, бундан илк нөвбәдә Азәрбајҹан өзү зәрәр ҝөрәҹәк. Иран һүҹумлара дәрһал ҹаваб вермәли олса, Исраилин Азәрбајҹандакы һәдәфләрини нишан алаҹаг".

Диггәт: Хәбәрдән истифадә етдикдә мәнбәјә истинад лазымдыр