Әһли Бејт -АБНА- хәбәр аҝентлијинин вердији хәбәрә ҝөрә Гәзәнфәр Ағајев Астара базарыны сөкдүрмәк истәдији үчүн гадынларын көтәјинә туш ҝәлиб

Астара рајонуна јени иҹра башчысы тәјин олунмуш Гәзәнәфәр Ағајев Масаллыда һәјата кечирмәк истәдији ишләрин аналогуну бурада да реаллашдырмаг истәјиб. Амма үнваны сәһв салыб. Дүнән Астара базарына баш чәкән јени иҹра башчысы ораны сөкдүрәҹәјини дејиб.

Мәлуматлы мәнбәнин вердији мәлумата ҝөрә, базарда алвер едән јерли гадынларла сөһбәт әснасында Гәзәнфәр Ағајев јени базарда онлара јер вериләҹәјини десә дә, бир гәдәр ағыз сүрүндүрүб. Даһа сонра исә сајмазјана һәрәкәт едәрәк, бүтүн һалларда базарын сөкүләҹәјини билдириб. Бундан бәрк гәзәбләнән алверчи гадынлар онун үзәринә һүҹум чәкибләр. Нәтиҹәдә, иҹра башчысы көтәкләниб. Һадисә јериндән мүавинләри васитәси илә бир тәһәр узаглашан Ағајев орадан да бирбаша Бакыја ҝәлиб.

Мәнбә билдирир ки, астаралы гадынлар Гәзәнфәр Ағајевә хатырладыблар ки, о, Масаллы илә бу рајону сәһв салмасын. Јохса, бу ҹүр һәрәкәтләрин даһа ағыр формалары илә үзләшә биләр.

Гејд едәк ки, Гәзәнфәр Ағајев Масаллыда иҹра башчысы олан заман Мәркәзи Базары сөкдүрәрәк, јериндә тиҹарәт мәркәзләри инша етдирмишди. Һәмин вахт бу мәсәлә наразылыға сәбәб олса да, кичик саһибкарлар Астарада олдуғу кими аддым атмамышдылар. Ҝөрүнүр, иҹра башчысы бу һадисәдән сонра елә зәнн едиб ки, Астара да елә Масаллы кими олаҹаг. Амма ишин тәрс тәрәфи илә үзләшмәли олуб.

 

Диггәт: Хәбәрдән истифадә етдикдә мәнбәјә истинад лазымдыр